NUG မှ ဒေါ်အောင်ဆန်းစုကြည်နှင့် ဦးထင်ကျော်ကို လူမျိုးတုံးသတ်ဖြတ်မှု ဖမ်းဝရမ်းမှ ဖယ်ရှားရန် တောင်းဆို
အမျိုးသားညီညွတ်ရေးအစိုးရ (NUG) မှ အာဂျင်တီးနား တရားရုံးက ထုတ်ပြန်ထားသော လူမျိုးတုံးသတ်ဖြတ်မှုဆိုင်ရာ ဖမ်းဝရမ်းမှ သမ္မတဟောင်း ဦးထင်ကျော်နှင့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို ဖယ်ရှားပေးရန် တောင်းဆိုလိုက်သည်။
ဖေဖော်ဝါရီ ၁၈ ရက်နေ့တွင် ထုတ်ပြန်ထားသော NUG ၏ သတင်းထုတ်ပြန်ချက်အရ ယင်းဖမ်းဝရမ်းထုတ်ခြင်းသည် မှားယွင်းသော တရားစွဲဆိုမှုဖြစ်သည်ဟု ဖော်ပြထားသည်။ ၂၀၁၇ ခုနှစ်တွင် ရိုဟင်ဂျာ လူမျိုးများကို အကြမ်းဖက် တိုက်ခိုက်ခဲ့မှုသည် မြန်မာစစ်တပ်ခေါင်းဆောင်များနှင့် တပ်ဖွဲ့ဝင်များက ကျူးလွန်ခဲ့ခြင်းဖြစ်ပြီး ထိုသူများကိုသာ တရားဝင် တာဝန်ယူစေသင့်ကြောင်း NUG မှဆိုသည်။
NUG ၏ ထုတ်ပြန်ချက်တွင် သမ္မတဟောင်း ဦးထင်ကျော်နှင့် ဒေါ်အောင်ဆန်းစုကြည်တို့သည် ရိုဟင်ဂျာအရေးကို ဖြေရှင်းရန် "ကိုဖီအာနန်ကော်မရှင်" တည်ထောင်ခြင်းအပါအဝင် နည်းလမ်းများဖြင့် ကြိုးပမ်းခဲ့ကြောင်း၊ NUG ၏လက်ရှိ ရိုဟင်ဂျာမူဝါဒသည်လည်း တရားမျှတမှုကို ပြန်လည်ရရှိစေရန် ရည်ရွယ်ထားသည်ဟု ဖော်ပြထားသည်။
ထို့အပြင် လူမျိုးတုံးသတ်ဖြတ်မှုနှင့် ပတ်သက်၍ တာဝန်ရှိသူများကို တရားစွဲဆိုနိုင်စေရန် နိုင်ငံတကာ တရားစီရင်ရေးစနစ်များတွင် အပြစ်ပေးနိုင်ရန် NUG အနေဖြင့် ထောက်ခံကြောင်းလည်း ထုတ်ပြန်ချက်တွင် ပါရှိသည်။
ဖေဖော်ဝါရီ ၁၃ ရက်နေ့တွင် အာဂျင်တီးနား တရားရုံးက မြန်မာစစ်တပ်ခေါင်းဆောင်များနှင့် တာဝန်ရှိသူများအပါအဝင် သမ္မတဟောင်း ဦးထင်ကျော်နှင့် ဒေါ်အောင်ဆန်းစုကြည်တို့ကို ဖမ်းဝရမ်းထုတ်လိုက်ခြင်း ဖြစ်သည်။
ဤသတင်းအပေါ် စစ်ကောင်စီ၏ တုံ့ပြန်ချက်ကို မေးမြန်းရန် RFA သည် ပြောခွင့်ရ ဗိုလ်ချုပ် ဇော်မင်းထွန်းကို ဆက်သွယ်ခဲ့သော်လည်း တုံ့ပြန်မှုမရှိခဲ့ပါ။
Posts
