ကွတ်ခိုင်ရှိ KIO ရုံးကို TNLA ဝင်ရောက်စီးမှုကြောင့် တင်းမာမှုများ ဖြစ်ပေါ်

ကွတ်ခိုင်ရှိ KIO ရုံးကို TNLA ဝင်ရောက်စီးမှုကြောင့် တင်းမာမှုများ ဖြစ်ပေါ်

ရှမ်းပြည်နယ်မြောက်ပိုင်း၊ ကွတ်ခိုင်မြို့ရှိ ကချင်လွတ်လပ်ရေးအဖွဲ့ (KIO) ဆက်ဆံရေးရုံးသို့ တအာင်းတပ် (TNLA) ဝင်ရောက်စီးမှုကြောင့် တင်းမာမှုများ ဖြစ်ပေါ်နေသည်။ KIO ဒုတိယဗိုလ်ချုပ်ကြီး ဂွမ်မော်က ယင်းအခြေအနေကို လူထုနှင့် ဆွေးနွေးပြီးမှ ဆုံးဖြတ်ချက် ချမှတ်သွားမည်ဟု ပြောကြားထားသည်။

မတ်လ ၇ ရက်ညနေပိုင်းတွင် TNLA တပ်ဖွဲ့ဝင် ၁၀၀ ခန့်သည် KIO ရုံးသို့ ရောက်ရှိလာပြီး KIA တပ်ဖွဲ့ဝင်များအား ရုံးမှ ထွက်ခွာရန် တောင်းဆိုခဲ့သည်။ ထို့နောက် အငြင်းပွားမှုဖြစ်ပွားကာ KIA တပ်ဖွဲ့ဝင် ၂၀ ကျော်သည် TNLA တပ်များ၏ ယာဉ်များသို့ တက်ပြီး ရုံးမှ ထွက်ခွာသွားခဲ့သည်။ ယင်းနောက်ပိုင်းတွင် TNLA တပ်များသည် KIO ရုံးတွင် ထိုင်ချထားသည်ဟု ဒေသခံများက ပြောကြားခဲ့သည်။

ဤဖြစ်ရပ်နှင့်ပတ်သက်၍ KIO ဒုတိယဗိုလ်ချုပ်ကြီး ဂွမ်မော်က မတ်လ ၈ ရက်တွင် လူမှုကွန်ရက်စာမျက်နှာတွင် "လူထုနှင့် အစည်းအဝေးပြုလုပ်ပြီး သဘောထားများ ရယူကာ ဆုံးဖြတ်ချက် ချမည်" ဟု ပြောကြားခဲ့သည်။

ကွတ်ခိုင်မြို့သည် ၁၀၂၇ စစ်ဆင်ရေးအတွင်း TNLA နှင့် ကိုးကန့်တပ် (MNDAA) တို့ပူးပေါင်းသိမ်းပိုက်ခဲ့ရာ KIA တပ်များက နမ့်ဖတ်ကာဘက်သို့ ထွက်ခွာသွားခဲ့သည်။ ယခုအခါ TNLA သည် မြို့ရှိ ရပ်ကွက် ၁၊ ၂၊ ၃၊ ၅၊ ၈ တို့ကို အုပ်ချုပ်နေပြီး MNDAA သည် ရပ်ကွက် ၄၊ ၆၊ ၇ တို့ကို အုပ်ချုပ်နေသည်ဟု ဒေသခံများက ပြောကြားသည်။ KIA တပ်များသည် မြို့တွင်း အုပ်ချုပ်မှုတွင် ပါဝင်မှု မရှိကြောင်းလည်း သိရသည်။

TNLA ၏ ထိုးစစ်ဆင်မှုနှင့် လက်ရှိ အခြေအနေများအား သက်ဆိုင်ရာ များထံမှ ထပ်မံ အတည်ပြုနေဆဲဖြစ်သည်။