အေအေက ပဲခူး-ရခိုင်အစပ် နတ်တောင်နှင့် ညောင်ကျိုးစခန်းများကို ပိတ်ဆို့ထိုးစစ် ဆင်နွှဲ

ပဲခူးတိုင်း၊ ပန်းတောင်းမြို့နယ်ရှိ နတ်တောင် တာဝါတိုင်စခန်းနှင့် ညောင်ကျိုး လက်နက်ကြီးစခန်းများကို အာရက္ခတပ်တော် (AA) မှ ပိတ်ဆို့ထိုးစစ်ဆင်နေခြင်းကြောင့် ယနေ့ ဖေဖော်ဝါရီ ၂၃ ရက်တွင် တိုက်ပွဲများ ပြင်းထန်စွာ ဆင်နွှဲနေကြောင်း သိရသည်။

စစ်ရေးအရင်းအမြစ်များအဆိုအရ ညောင်ကျိုးစခန်းနှင့် နတ်တောင်စခန်းတို့တွင် စစ်ကောင်စီတပ်သားများ အင်အားကြီးစွာ တပ်ရင်းထားခဲ့ပြီး ယခုထိုးစစ်အတွင်း စစ်ကောင်စီတပ်ဖွဲ့ဝင်များ အစာရိက္ခာနှင့် ရေပြတ်လပ်နေသည်ဟု သိရသည်။

"နတ်တောင်စခန်းသည် ပုဂံကွဲနှင့် ညောင်ကျိုးကြားတွင် တည်ရှိပြီး ညောင်ကျိုးတွင် တိုက်ပွဲများ ပြင်းထန်နေသဖြင့် နတ်တောင်သို့ အစားအစာနှင့် ရိက္ခာပို့ဆောင်နိုင်ခြင်း မရှိတော့ကြောင်း" အေအေ စစ်ရေးအရင်းအမြစ်တစ်ဦးက ပြောသည်။

ထို့အပြင် တိုက်ပွဲများအတွင်း စစ်ကောင်စီက လေယာဉ်များထက် စက်တပ်လေထီးများ အသုံးပြုကာ ဆက်တိုက် ဗုံးကြဲခြင်းများ ဆောင်ရွက်ခဲ့ကြောင်း သိရသည်။ မကြာသေးမီနေ့က စက်တပ်လေထီးနှစ်စီးကို အေအေအဖွဲ့ဝင်များက ပစ်ချနိုင်ခဲ့ပြီး တစ်စီးမှ စစ်သားတစ်ဦး၏ အလောင်းကို ပြန်လည်ရရှိခဲ့ကြောင်းလည်း သတင်းရရှိသည်။

ညောင်ကျိုးစခန်းပေါ်မှ ထိုးစစ်များကို အနီးအနားမှ အမှတ် ၆ ကာကွယ်ရေးပစ္စည်းစက်ရုံမှ လက်နက်ကြီးများဖြင့် အကူအညီပေးနေခြင်းကြောင့် တိုက်ပွဲများ ပိုမို ပြင်းထန်လာခဲ့သည်။

လတ်တလောအချိန်တွင် အေအေအဖွဲ့သည် ပဲခူးတောင်ပိုင်းရှိ မိုးထိတောင်စခန်းနှင့် ပုဂံကွဲစခန်းများကို သိမ်းပိုက်ပြီးနောက် နတ်တောင်နှင့် ညောင်ကျိုးစခန်းများကို ထပ်မံထိုးစစ်ဆင်နွှဲနေခြင်းဖြစ်သည်။

အေအေ ထိုးစစ်ဆင်နေသော ပဲခူးပိုင်းတွင် နယ်မြေခံ ပြည်သူ့ကာကွယ်ရေးတပ်ဖွဲ့များ၊ ကျောင်းသားလက်နက်တပ်ဖွဲ့များနှင့် ဗမာပြည်သူ့ လွတ်မြောက်ရေးတပ်တော် (BPLA) တို့ကလည်း ပူးပေါင်းတက်ကြွစွာ တိုက်ခိုက်နေကြောင်း သိရသည်။