TNLA ထိန်းချုပ်ဒေသတွင် မြေမြှုပ်မိုင်းကြောင့် တစ်လအတွင်း ၆ ဦးသေဆုံး၊ ၈ ဦးဒဏ်ရာရ

TNLA ထိန်းချုပ်ဒေသတွင် မြေမြှုပ်မိုင်းကြောင့် တစ်လအတွင်း ၆ ဦးသေဆုံး၊ ၈ ဦးဒဏ်ရာရ

ရှမ်းပြည်နယ်မြောက်ပိုင်းတွင် တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်နေသည့်ဒေသများတွင် ဖေဖော်ဝါရီလအတွင်း မြေမြှုပ်မိုင်းများကြောင့် အရပ်သား ၆ ဦး သေဆုံးပြီး ၈ ဦး ဒဏ်ရာရခဲ့ကြောင်း TNLA မှ မတ်လ ၁ ရက်တွင် ထုတ်ပြန်ထားသည်။

ထိုသေဆုံးမှုများအနက် သီပေါမြို့နယ်တွင် ၃ ဦး သေဆုံး၍ ၄ ဦးဒဏ်ရာရရှိခဲ့ပြီး၊ ကွတ်ခိုင်မြို့နယ်တွင် ကလေးငယ် ၂ ဦးအပါအဝင် ၃ ဦး သေဆုံးကာ ၃ ဦးဒဏ်ရာရခဲ့ကြသည်။ ထို့ပြင် နမ့်ခမ်းမြို့နယ်တွင်လည်း တစ်ဦး ဒဏ်ရာရသွားကြောင်း ထုတ်ပြန်ချက်တွင် ဖော်ပြထားသည်။

ဒေသခံများအနေနှင့် မတော်တဆထိခိုက်မှုများ မဖြစ်စေရန် မြေမြှုပ်မိုင်းများနှင့်စစ်လက်နက်အကြွင်းအကျန်များအကြောင်း အသိပညာပေးလုပ်ငန်းများကို ပိုမိုဆောင်ရွက်ပေးရန် လိုအပ်ကြောင်း တစ်ဦးက ပြောသည်။

"မြေမြှုပ်မိုင်းတွေက မည်သည့်နေရာတွင်ရှိနေသည်ကို မသိနိုင်ပါဘူး။ သာမန်ပြည်သူတွေက မသိတော့ မတော်တဆဖြစ်နိုင်တာပဲ။ သေဆုံးတာတွေအများစုကလည်း မိုင်းတွေကို ကောက်ယူဆော့ကစားရာကနေ ဖြစ်တာဖြစ်ပါတယ်။ ဒါကြောင့် အသိပညာပေးနဲ့ မိုင်းရှင်းလင်းရေးလုပ်ဆောင်ဖို့ မဖြစ်မနေလိုအပ်ပါတယ်" ဟု ကွတ်ခိုင်မြို့ခံတစ်ဦးက ပြောသည်။

TNLA ထိန်းချုပ်ဒေသတွင် မြေမြှုပ်မိုင်းဖြင့် အရပ်သားများ ထိခိုက်သေဆုံးမှုများအပေါ် တအာင်းအမျိုးသားလွတ်မြောက်ရေးတပ်မတော်မှ တာဝန်ရှိသူများထံ RFA သတင်းဌာနက ဆက်သွယ်မေးမြန်းခဲ့သော်လည်း တုံ့ပြန်မှု မရရှိသေးပေ။

မြန်မာနိုင်ငံအတွင်း ၂၀၂၄ ခုနှစ် ဇန်နဝါရီလမှ စက်တင်ဘာလအထိ မြေမြှုပ်မိုင်းနှင့် စစ်ကျန်လက်နက်များ ပေါက်ကွဲမှုကြောင့် ၁၃၀ ဦး သေဆုံးပြီး ၇၅၉ ဦး ဒဏ်ရာရခဲ့ကြောင်း ကုလသမဂ္ဂကလေးများရန်ပုံငွေအဖွဲ့ (UNICEF) ၏ အစီရင်ခံစာအရ သိရှိရသည်။

ထို့အတူ ထိုကာလအတွင်း ရှမ်းပြည်နယ်တွင် သေဆုံးမှု ၂၂ ဦး၊ ဒဏ်ရာရမှု ၁၉၉ ဦးနှင့် အများဆုံး ဖြစ်ခဲ့သော်လည်း၊ စစ်ကိုင်းတိုင်းတွင် ၂၇ ဦး သေဆုံးမှု ဖြစ်ခဲ့ပြီး ရခိုင်ပြည်နယ်တွင်လည်း ၂၂ ဦး သေဆုံးမှုများ ဖြစ်ပွားခဲ့ကြောင်း အစီရင်ခံစာတွင် ဖော်ပြထားသည်။