ချင်းလက်နက်ကိုင်အဖွဲ့များအနေနဲ့ အိန္ဒိယနဲ့ ပူးပေါင်းလုပ်ဆောင်ဖို့ မီဇိုရမ်ပြည်နယ်အမတ် ပြောကြား

ချင်းလက်နက်ကိုင်အဖွဲ့များအနေနဲ့ အိန္ဒိယနဲ့ ပူးပေါင်းလုပ်ဆောင်ဖို့ မီဇိုရမ်ပြည်နယ်အမတ် ပြောကြား

မတ်လ ၇ ရက် (Rakine Focus) – ချင်းလက်နက်ကိုင်အဖွဲ့များအနေနဲ့ အိန္ဒိယနိုင်ငံနှင့် ပူးပေါင်းလုပ်ဆောင်သင့်ကြောင်း မီဇိုရမ်ပြည်နယ်အထက်လွှတ်တော်အမတ် Pu K. Vanlalvena က ပြောကြားခဲ့ပါတယ်။
Pu K. Vanlalvena ဟာ ဖေဖော်ဝါရီ ၂၇ ရက်နေ့မှာ ချင်းအမျိုးသားတပ်ဦး (CNF) ဗဟိုဌာနချုပ် ချင်းလုံမြို့ကို သွားရောက်ခဲ့ပြီး "မီဇိုနဲ့ချင်းဟာ တစ်မျိုးတည်းဖြစ်ကြောင်း၊ ၁၉၃၅ ခုနှစ်အထိ အင်္ဂလိပ်လက်အောက်က အိန္ဒိယနိုင်ငံတွင် တူညီစွာ နေထိုင်ခဲ့ကြောင်း" ပြောကြားခဲ့ပါတယ်။

အိန္ဒိယနိုင်ငံခြားရေးဝန်ကြီးဌာနရဲ့ မေတ္တာရပ်ခံချက်အရ ချင်းလက်နက်ကိုင်အဖွဲ့များ ပေါင်းစည်းညီညွတ်စေရန် မီဇိုရမ်ပြည်နယ်ဝန်ကြီးချုပ် Pu Lalduhoma ဟာ ကြိုးပမ်းခဲ့ပြီး၊ ဖေဖော်ဝါရီ ၂၆ ရက်နေ့မှာ မီဇိုရမ်ပြည်နယ်၊ အိုက်ဇောလ်မြို့မှာ ချင်းပြည် (Chinland) ကောင်စီနဲ့ ကြားကာလချင်းအမျိုးသားအတိုင်ပင်ခံကောင်စီ (ICNCC) တို့တွေ့ဆုံပြီး ချင်းအမျိုးသားကောင်စီ (Chin National Council) အသစ်ဖွဲ့စည်းရန် သဘောတူညီခဲ့ကြပါတယ်။
၂၀၂၁ ခုနှစ် မြန်မာစစ်တပ်အာဏာသိမ်းပြီးနောက် ချင်းပြည်နယ်တွင်း တိုက်ပွဲများဖြစ်ပွားခဲ့ပြီး၊ ချင်းပြည်နယ်မှ ပြည်သူ ၇ သောင်းကျော် အိန္ဒိယနိုင်ငံ မီဇိုရမ်ပြည်နယ်သို့ ထွက်ပြေး တိမ်းရှောင်ခဲ့ရကြောင်း သိရှိရပါတယ်။